المساعد الشخصي الرقمي

مشاهدة النسخة كاملة : حسين الموسوي لـ alazraq.com : لن ألعب محليا ً لغير الزعيم(تمت اضافة الصور)



Fahad
04-03-2007, 13:15
بدأناها مع " الجكوار " فرج لهيب في بدايه الموسم :



http://diwania.alazraq.com/showthread.php?t=147001 (http://diwania.alazraq.com/showthread.php?t=147001)



ثم حلقنا عاليا ً مع " الجناح الطائر " علي الشمالي :



http://diwania.alazraq.com/showthread.php?t=150089 (http://diwania.alazraq.com/showthread.php?t=150089)




وها نحن نعود من جديد و " حصريا ً " من أحد نجوم الكره الكويتيه الواعده وهو النجم : حسين الموسوي الذي قدم مستوى طيب في الدوري المحلي وفي بطوله الخليج لفتت الأنظار إليه . .



وكدأب الفريق الإعلامي بـ alazraq.com بأن يكون السبّاق في تسليط الضوء على كل ماهو جديد ومثير بالساحه الرياضيه . . حرصنا على لقاء النجم حسين الموسوي لتسليط الضوء عليه أكثر وتعريف الجمهور به كنجم واعد للكره الكويتيه


نترككم مع هذا اللقاء الشيّق ونعتذر عن التأخير في طرح المقابله . . وكذلك نعتذر عن عدم وجود صور للمقابله لخلل أصاب الكاميرا


::


البطاقة الشخصيه :




حسين محسن الموسوي
الدراسه : كلية التربيه الاساسيه بدنيه
الحاله الاجتماعيه : خاطب
مواليد 1988 شهر 7




1\ أي نادي تفضل بعد النادي العربي محليا :



نادي الكويت وكاظمه والقادسيه



2\ افضل حارس بالكويت وافضل مهاجم بالكويت :



نواف الخالدي افضل حارس وبدر المطوع افضل مهاجم :)



3\ حسين الموسوي انت تملك مهارة التسديد ليش ما نشوفك هالموسم تشوت فاولات او تشوت من بعيد مع الفريق الاول ؟



للحين ما اخذت الفرصه وللحين ما تجرأت بالملعب



4\ فراس الخطيب قال انك انت خليفته اشرايك في كلامه ؟



فراس الخطيب لاعب كبير واعتز بشهادته فيني .. وكلامه راح يرفع من معنوياتي ..



5\ مارأيك بجماهير العربي ؟



اوفى جمهور هو جمهور العربي بلا ادنى شك ..



6\ في اي مركز تحب انك تلعب او احسن مركز تحس انك تقدر تعطي فيه ؟



صانع العاب او تحت المهاجمين ومايحب يلعب طرف لانه ما يقدم مستواه




* في هذه الاثناء يرن تلفون مبارك الدوسري ويرد على بو شملان ويسأل بوشملان إذا عنده سؤال حق حسين الموسوي وبوشملان يوجه له نصيحه للإبتعاد عن الغرور فالغرور مقبره اللاعبين وحسين الموسوي يتقبل النصيحه برحابه صدر



7\ افضل تشكيله للعربي بوجهة نظرك ؟



محمد غانم ..



علي مقصيد ..ابراهيم المشخص .. المرزوقي .. حسين الغريب



طلال خلفان ..



احمدموسى .. محمد جراغ .. خالد خلف



فراس الخطيب .. جراح الزهير ..



8\ الكل شبه بدايتك يا حسين ببداية بشار عبدالله فهل انت محظوظ ؟



حظي سيء لان بدايتي كانت في هذا الجيل الذي يختلف عن جيل بشار وجاسم وبدر حجي وفواز بخيت والنجوم جميعا



9\ لماذا انضممت الي النادي العربي ؟



منو مايحب ما ينضم الى النادي العربي ! حبي له خلاني انضم للنادي



10 \هل سوف تستمر بالنجوميه التي انت فيها الأن ؟



بعد راسي ماتقصر وانشالله ماقصر واحافظ عليها



11\ اشرايك بـ عبدالعزيز المشعان وبدر وارد ؟



عبدالعزيز المشعان لاعب فنان ومهاري ولا عب نادر ..



وبدر وارد انشالله يحافظ على مستواه وهو لاعب جيد



12\ شرايك في مجموعة العربي في ابطال اسيا ؟



مجموعه صعبه بموجود الريان والوحده والفريق العراقي فريق عادي
والي راح ينافسون 3 العربي الوحده الريان



13\ لاعب محلي تتنمى وجوده بالعربي ؟



عادل الحمود وخالد الرشيدي




14\ مدرب تتمنى ان يمسك المنتخب الكويت ؟



ميلان ماتشالا



15\ اشرايك في طلال خلفان كمحترف ؟



لاعب ممتاز .. وسبب نزول مستواه هو المدربين .. مايلعبونه بمكانه مره باك ومره صانع العاب ومره وسط متأخر وشلون تبي اللاعب يبدع وانت مو حاطه بمكانه !



16 \ اشرايك بالنادي الملكي ؟



الكبير كبير



* مبارك الدوسري مقاطعا شكو يسمون القادسيه النادي الملكي واحنا نعتمد على الاماره وليس الملكيه ويقول خرابيط !



17\ نادي تتمنى الاحتراف فيه محليا خليجي عالمي ؟



لا فريق غير العربي .. الاتحاد السعودي .. اي نادي عالمي



18\ امنيه تتمنى تحقيقها مع المنتخب ؟



التأهل الي كاس العالم الياي :)



19\ انضمامك الي المنتخب وانت بهالسن هل كان فيه تأثير سلبي عليك ؟



لا بالعكس فر حت وايد وخصوصا انهم اختاروني بدل بشار وطبعا بشار لاعب كبير والحمدالله



20\ لاعب مظلوم اعلاميا على مستوى الكويت ؟



طلال نايف ومالك القلاف



21\ اي من الانديه العالميه تشجع في الدوري الايطالي والاسباني والانجليزي ؟



لا اتابع الدوري الايطالي .. ريال مدريد .. وتيشلسي



22\ العربي وافق على اعارتك الان وعندك فريقان اصفر وابيض اي نادي تروح ؟



نادي الكويت



23\ في احدى مبارايات الخرافي صار فاول وجراغ وانت كنتو واقفين على الكره وانت كنت بتشوت بس جراغ شاتها وانت رحت وزعلت وراحلك جراغ وانت صديت عنه صج ؟



ضاحكا .. انا ماصديت عنا بس كان ودي اشوت الفاول لاني حاس اني اقدر اسوي شي بهالفاول وبس وياني وقالي ماعليه بوعلي وانا ماصديت عنه ولا شي



24 \ ركز على مهارة التسديد ماقمنا نشوفك تشوت ؟



انشالله .. وانا كلمت المدرب يحطلي برنامج فاولات والتسديد بو ربع ساعه بس ماصار شي



25\ اشرايك بلاعبي نادي التضامن ؟


فيها عناصر شابه جيده امثال فهد الرشيدي وخالد الرشيدي وبدر وارد



26 \ شسالفتكم ويه نادي التضامن كل ماتخسرون منهم تغيرون مدربين ؟



طبعا كل نادي وده يفوز ويقدم شي جدام نادي العربي الزعيم



27\ اذا كنت ماسك فريق النادي العربي شنو كنت راح تسوي ؟



العب الشباب واصعدهم للفريق الاول واذا بييب محترف مستواه حاله من مستوى الاعبين اكنسله .. واوزع الفلوس على الاعبين عشان احفزهم ويقدمون مستوى يا انك تييب محترفين توب يا لاتييب



28 \ بطولة الخليج ظهر رئيس الاتحاد السابق في قناة الكاس وفي ليلة مباراة الكويت والامارات هل ظهوره ونشره الغسيل اثر عليكم ؟



انا واحد من الاعبين مااثر علي كلش .. ولا حتى الاعبين




29 \ مع تطور العلم وتطور الحياة هل انتو الاعبين محتاجين اخصائي غذاء ولا اخصائي نفسي ؟



ضحك على هذا السؤال .. وقال عيب احط اخصائي نفسي حق الاعبين ويقول ماراح يأثر فينا



30\ افضل رئيس نادي وافضل لاعب بنادي القادسيه ؟



مرزوق الغانم .. وبدر المطوع ..



31\ هل كان في عرض لك من النادي الاهلي القطري اثناء بطولة الخليج ؟



لا ماحصل هالشي .. اشاعات



32\ وين تحلق بأي صالون ؟



ضاحكا..فرست كلاس بالسالميه



33\ احسن لاعب في بطولة الخليج ؟



اسماعيل مطر الصراحه



34\مدافع تحسبله الف حساب ؟



يعقوب الطاهر



35\شرايك بـ 3-1 مع القادسيه . . شنو تعليقك عليها ؟



كنا فايزين الشوط الاول وضاغطين عليهم .. بس فقدنا التركيز بالشوط الثاني .. والقادسيه استغلوا هالشي ويستاهلون



36\ افضل المحترفين بالدوري الكويت ؟
فراس الخطيب .. طلال يوسف



37\ ماهو شعورك عندما يتابعك زكريا من خلال المباريات والتمارين ؟



افرح واستانس يعني عمي يشوفني باللعب يعطيني دافع



38 \ احمد موسى يعتزل ؟



اتوقع انه قدم كتاب للاداره للاعتزال ولاعب كبير ووكفى ووفى



39 \ هل هناك مشاكل بين الاعبين والاداره ؟


لا ماكو شي الحمدالله



40 \ قدوتك في الملاعب محليا وعالميا ؟



احمد موسى .. زيدان .. اعشق ربورتو كارلوس



41 \ احلى شيله من شيلات جمهور العربي ؟


العب يالزعيم العب .. تعطينا حماس مو طبيعي باللعب



42 \ كلمه اخيره للموقع والاعضاء



مشكورين على هاللقاء الحلو .. واستمتعت بالاسئله وبالتوفيق لكم




::





مقتطفات من اللقاء :




* حضر حسين الموسوي الى اللقاء قبل انتهاء مباراة القادسيه والزمالك بعشر دقائق وماكان فيه احد الا المراقب فواز وعشقي الاصفر



*توقف اللقاء ربع ساعه للعشاء الذي كان برعايه الدوسري 7



* لعب حسين الموسوي كرة الطائره مع فريق العربي الذي فاز على فريق القادسيه 3-0



* شاهد حسين الموسوي الشوط الاول للقاء التركيون والحماديون وغادر بعدها ..



* علق احد الاعضاء بانها افضل وامتع مقابله شهدها الازرق دوت كوم



ملاحظه " 1 " : اللقاء مسجل على جهاز تسجيل للتوثيق وللأمانه الإعلاميه


ملاحظه " 2 " : في أسئله ماحطيناها لخلل فني بالتسجيل " نعتذر عنه " وراح نتلافاه بالمرات القادمه بإذن الله . . السموحه




حـسين الـموسوي مع العرباويه :arabi:
http://www.image2host.com/uploads/7212e8314d.jpg


http://www.image2host.com/uploads/dce68917e3.jpg


http://www.image2host.com/uploads/6a4bbc257c.jpg


http://www.image2host.com/uploads/46e939ecd5.jpg


http://www.image2host.com/uploads/b3f3fcd3ac.jpg


قـدساوي - كـويتاوي - عـرباوي
http://www.image2host.com/uploads/eada433c4f.jpg


الـموسوي بلعب الطـائرة..اللي انتهت بفوز العرباويه
http://www.image2host.com/uploads/543e4fb120.jpg

Corvette
04-03-2007, 13:23
كشران زجيلان ع المقابلة ..
وموفق يـا حسين وبرد لك الـ 3 إن شاء الله :)

makkay
04-03-2007, 13:26
مقابله قصيره حييل

في جم سؤال سألنا وما سألتوه !!

كبير بو علي

"ARSENAL"
04-03-2007, 13:34
يعطيكم العافية خوش مقابلة

الصريح
04-03-2007, 13:36
مشكور يافهد عاللقاء..
وماقصرت يابوعلي على روحط الطيبه..


* لعب حسين الموسوي كرة الطائره مع فريق العربي الذي فاز على فريق القادسيه 3-0


تصحيح بس
خسرنا2-1وانسحبو ماكملو الشوط الرابع واتجهو يلعبون كره:)
وكنى عازمين عالتعادل والفوز بالشوط الخامس..

Corvette
04-03-2007, 13:37
مكاي .. جاوب على جميع الاسئلة ..
لكن العتب على التسجيل ماكان واضح !

عربــاوي
04-03-2007, 13:39
مكاي .. بعطيك المسجل .. اذا فهمت سؤال واحد اعطيك الي تبيه :p
ازعاج :/ .. ومبارك الله يهداه حاط التسجيل بعييييد عنه :/

makkay
04-03-2007, 13:41
لا في سؤال اسأله برو عن الحركه بعد كل هدف يسجله :p
انا ناطر المقابله علشان هالسؤال

ثانكسيو همن

اليوفي
04-03-2007, 14:01
بس تعديل اخوي فهد .. اهوا قال ممكن انتقل الى القادسيه عن طريق الإعاره لموسم :)

وخوش مقابلة ويعطيك العافيه فهد ..

Corvette
04-03-2007, 14:05
بس تعديل اخوي فهد .. اهوا قال ممكن انتقل الى القادسيه عن طريق الإعاره لموسم :)

وخوش مقابلة ويعطيك العافيه فهد ..
مو فهد الي منزل المقابلة الي كاتبها عرباوي .. فعادي :D

e3feeny
04-03-2007, 14:07
22\ العربي وافق على اعارتك الان وعندك فريقان اصفر وابيض اي نادي تروح ؟



نادي الكويت

يالموسوي منو الي ما يتمنى يلعب بالعميد .. هذا عميد الانديه
كنت عاجبني .. والحين اغرمت فيك :p
والله كبير وعندك ذوق الصراحه :)

شكرا عالمقابله

Fahad
04-03-2007, 14:10
الله يعافيكم جميعا ً

بالنسبه لبعض الأسئله . . فالإخوان نزلوها وفرغوها من جهاز التسجيل وأيضا ً بيوم المقابله ماقدرت أحضر لذلك أي خطئ أو زلل فالعذر والسموحه إخواني & خواتي

وكلمه شكر توجه للإخوان إلي تواجدوا بالمقابله وأجه لهم إعتذاري على عدم تواجدي على الرغم من إني الداعي لضيفنا الكريم لظروف سفري وكذلك إعتذاري للضيف نفسه على عدم تواجدي

:)

عربــاوي
04-03-2007, 14:12
مو فهد الي منزل المقابلة الي كاتبها عرباوي .. فعادي :D


التسجيل موجود .. اذا سمعت انه يروح القادسيه اعاره لك الي تبيه :)

وفي فتره مبارك مسكر التسجيل بالغلط ورايح بالأسئله يعني الي مولاقي سؤاله يلوم مبارك :p

alkout
04-03-2007, 14:14
كبير يابوعلي :)


ومثل ماتبي الزعــيم ... جمــاهير الزعــيم تبيك

شدو الحــيل ومانتخلى عــنكم ابــد انشاءلله



عسـاكم عالقوه

Corvette
04-03-2007, 14:14
التسجيل موجود .. اذا سمعت انه يروح القادسيه اعاره لك الي تبيه :)

وفي فتره مبارك مسكر التسجيل بالغلط ورايح بالأسئله يعني الي مولاقي سؤاله يلوم مبارك :p
ماسمعت لما قالها بالمقابلة بإذنك ؟ :D

عربــاوي
04-03-2007, 14:17
ملاحظه : اللقاء مسجل على جهاز تسجيل للتوثيق وللأمانه الإعلاميه


ومو حلوه بعدين ييون ناس للازرق ويقولون نبي نسمع شلون الموسوي قال ابي القادسيه .. ومايلقونه بالتسجيل :)

نفس سالفة الشمالي .. جذبوا الازرق .. بس التسجيل موجود وقص ويوهم :)

Corvette
04-03-2007, 14:19
اهوا ماقال ابي القادسية .. قال ماعندي مشكله اذا إعاره ! :d

عربــاوي
04-03-2007, 14:23
^^

حتى لو اعاره .. واقره ردي السابق :)

انشالله تفهم وتقتنع :)

Corvette
04-03-2007, 14:26
ماعليك أمر أبي التسجيل مو تنسى ..

ع العموم من المقابلة " كنت موجود " الموسوي مل واهوا يطلب تدريبه على التسديد لكن محد رد عليه من الجهاز الفني وطنشوه ! ويقول ما ألوم الجمهور ليما يتهاوش بره ويكسر الباصات :p

ياريت يهتمون بهذا اللاعب .. لأنه مكسب إن شاء الله للعربي وللمنتخب ..

JuMBaZeYa
04-03-2007, 14:31
وااااي هاللاعب ايننن ماكو صور وthanks على اللقاء

David Villa
04-03-2007, 14:50
لا في سؤال اسأله برو عن الحركه بعد كل هدف يسجله :p
انا ناطر المقابله علشان هالسؤال

بالنسبة لحركته بعد قول الكويت..لما أشر بايده عن اثنين كان قصده ان حط قولين بهالمباراة
وعلى الفضلي, وباجي الحركات يسويها حق مجموعه من الشباب "شفـره" :D
-
الصراحه من احلى المقابلات وحرام ما خذت حقها! وخاصة الصور وباجي الاساله
حسين الموسوي عالطبيعه إنسان حبوب ومتواضع ومو مثل ما قالوا عنه مغرور
وما ادري شنو..الله يوفقه انشالله ومشكورين عالمقابله, عساكم عالقوه

Corvette
04-03-2007, 14:51
وايضا قال : الجمهور وايد رفعوا فيني ويطالبون مني كل شي ! وانا اقولهم صبرو علي وتوني في بداية المشوار :)

الريانه
04-03-2007, 15:09
قـواكم الله ويعطيه العافيـه الموسوي ..

في اسئله ما انسألت له مادري ليش .

عموما بخصـوص هالسؤال :




29 \ مع تطور العلم وتطور الحياة هل انتو الاعبين محتاجين اخصائي غذاء ولا اخصائي نفسي ؟



ضحك على هذا السؤال .. وقال عيب احط اخصائي نفسي حق الاعبين ويقول ماراح يأثر فينا



عيب ؟ الناس تطوراو واحنا يالكويتين خلونا على عقليـاتنا :)

الد بنت يره
04-03-2007, 15:21
انطرر وانطرر..واخرتها الاسأله ناقصه!


ع العموم مشكووورين

عربــاوي
04-03-2007, 15:23
بنت الديره ..

المره اليايه نسأل الاعبين 304 سؤال عشان نراضيكم :)

Fahad
04-03-2007, 15:24
بنت الديره . . شدعوه !


مو أول مقابله نحط الأسئله مو كامله لعده أسباب قد تكون فنيه أو برغبه من الضيف نفسه وإنتوا ماتدرون شنو ظروف المقابله بالأساس فمو حلوه هالأسلوب بالرد أبدا ً أختي !


مانبي لا كلمه مشكورين ولاشي . . بس هم مانبي مثل هالردود إلي تبخس حق إلي إجتهدوا عشان المقابله خصوصا ً الإخوان إلي فرغوا التسجيل وتعبوا بتفريغه :)


هالمره صار الخلل منا إحنا وقلنا وإعتذرنا من أول المقابله إنه صار خلل فني بالتسجيل ماكان واضح !


على العموم أختي . . حياج الله والسموحه للجميع مره ثانيه على القصور ونوعدكم نتلافى هالخطئ بالمرات القادمه !

ونتقبل النقد البنّاء وأي ملاحظه سلبيه تشوفونها لأنه أكيد في صالحنا هالشي . . قواج الله وخيتي

Corvette
04-03-2007, 15:25
بنت الديره ..

المره اليايه نسأل الاعبين 304 سؤال عشان نراضيكم :)
ياريت توضح لـ بنت الديره السبب .. والمقابلة مفتوحة وكل واحد يقدر يسئل الي يبيه :)

يا بنت الديره .. الموسوي جاوب على جميع الاسئلة لكن الخلل في جهاز التسجيل ماكان واضح لأنه كان بعيد عن الموسوي شوي .. يعني سؤال يجاوب واضح وسؤالين مو واضحين :) ياريت وصلنالج السبب

عربــاوي
04-03-2007, 15:34
ارد واقول ..

مقطع 9 .. بداية تسجيل صوت مقابلة الموسوي !
وكنا ماشين حلاوه :)

بعدين الظاهر .. طفا او شغله جذي .. لان على طول مقطع عشره اشتغل .. وكان مبارك يجرب الصوت ويقول واضح .. وكمل الاسئله :)

نعتذر عن هالخطأ .. انشالله ما تصير مره ثانييييه :)

واي سؤال سائلينه .. وتبون تعرفون اجابته .. حطو السؤال وانشالله الاخوان متذكرين الي قاله :)

الريانه
04-03-2007, 15:34
فهد

اذا تسمحلي اعلق شـوي ترا مو اول مره الاسئـله تكون ناقصـه هاذي صارت عادة لكم وللاسـف ..

ومع ذلك مشكورين وماقصـرتوا :)

Fahad
04-03-2007, 15:38
وهالشي قلته بردي الريانه . . نقص الأسئله شي وارد لعده أسباب أعيد وأقولها : إما خلل فني مثل ماصار ألحين أو بطلب من الضيف إنه مايجاوب على بعض الأسئله وهذا من حقه


بالعكس شي يونسنا لما نحط كل الأسئله وهذا من صالحنا . . بس الظروف إلي قد تحصل وذكرتها إهي إلي تمنع


لذلك كلمه " عاده " بدون معرفه سبب هالـ " عاده " مو سليم موضعها وذكرها :)


أتمنى الصوره وصلت لج أختي

::

ملاحظه : إلي عنده أي تعليق أو سلبيه بالمقابله أو أي مقابلات قادمه يراسلني على الخاص أو ينزل موضوع بقسم الإقتراحات يوجهنا فيه عشان مانشتت القارئ عن المقابله والردود إلي فيها :)

عربــاوي
04-03-2007, 15:41
الريانه روحي شوفي .. موضوع الاسئله .. يمكن اكثرهم حاطين 6 7 اسئله .. اذا بنحطهم كلهم شنو يصير ؟

صدق الي قال ارضاء الناس غايه لا تدرك

الد بنت يره
04-03-2007, 16:19
فهد
اعتذرر...معاك حق لكل مقابله ظروووف
اسمح لي ..خاني التعبير:)

MaisTro_4
04-03-2007, 16:20
مقابله عجييبه....
يعطييكم العافيه على هل مقابله الحلوه...

KinG^BaLL
04-03-2007, 16:23
قـــواكم الله شـــباب على الـمقابله ..

وحــسين نـجم واعد ،، الله يــوفقه مـع فـريقه والـمنتخب :) ..

كـل الشـكر لكـم بـوعابد و فـهد :):)

H.AMA.D
04-03-2007, 17:01
أهم شي سألتوه سؤالي رقم 40 :p
وعطيكم العافية شباب على المقابلة بس ناقصها صور

Claudio Mendez
04-03-2007, 17:13
عربـاوي ..

ليش معصب انت .. خو فهد قاعد يرد :p

..

خوش كلام من الموسوي .. ونتمنى يكتسب الثقه اكبر بروحه .. اهو يتميز بالشوتات من بره المنطقه

قدساوي_100%
04-03-2007, 18:41
يعطيكم على القابله

وكل الشكر لكم

Pro
04-03-2007, 19:58
يعطيكم العافية و ما قصرتوا ..

انزين نبي صور :o

Fahad
04-03-2007, 20:00
بنت الديره


بالعكس إحنا إلي نعتذر عن هالخلل إلي صار وطبعا ً لأول مره يصير عندنا هالخلل هالموسم مع مقابلاتنا وراح نتلافاه بالمقابلات القادمه بإذن الله


الله يكثر من أمثالج أختي الكريمه


::


حياكم الله جميعا ً


::


ترقبوا المقابله " القنبله " الشهر القادم إن شاءالله ;)

Corvette
04-03-2007, 22:24
صدق الي قال ارضاء الناس غايه لا تدرك
:D :D :D :D :D

Madridista4eveR
04-03-2007, 22:44
فعلا مقابله ممتعه من نجمنا حسين الموسوي ..

كان ناقصها صـور بس ..

بانتظار المزيد منك يالموسوي .. وانشاءالله تتحسن امورك مع امور

الزعيم ..

قواكم الله على الجهد ..

تحيـاتي

عبد العزيز الحمادي
04-03-2007, 22:44
قواكم الله على المقابلة .. والصراحة بو علي انسان متواضع ودش القلب من اول يوم ..

Arbawi4ever مو من حقك تصادر حق الاعضاء بسؤال اللاعب .. كيفهم يسألونه على راحتهم .. ليش احنا حاطين موضوع الأسئلة الله يهداك :) بعدين انت من متى صرت بالفريق الإعلامي للموقع .. مع كل احترامي لك كعضو نشط .. ولكن هذي من اختصاصات الفريق الإعلامي يحددون الأسئلة اللي تنزل او لا .. شدعوة عاد انت حاط الأسئلة :) :) انت عطوك التسجيل وتوهقت بالتسجيل مو واضح

GaGo_16
04-03-2007, 22:51
قواكـم اللـه يا جماعـه على المقـابله الحلـوه ومثـل ما قالوا الأعضاء ناقصهـا صور بس ..

وإنشاللـه تتلافـون الأخطاء في المقابلات القادمه ..

Q8italy
04-03-2007, 23:07
مقابـــلة روعة
اشكر جميع من رتب و عمل هذه المقابلة :)

و ردود حسين الموسوي كانت عفوية و تبرد جبد كل "عرباوي" و تقهر بعض الناس ;):p:D

كبير يابوعلي يالموسوي... كلنا معاك قلباً و تشجيعاً ...

عربــاوي
04-03-2007, 23:27
قواكم الله على المقابلة .. والصراحة بو علي انسان متواضع ودش القلب من اول يوم ..

Arbawi4ever مو من حقك تصادر حق الاعضاء بسؤال اللاعب .. كيفهم يسألونه على راحتهم .. ليش احنا حاطين موضوع الأسئلة الله يهداك :) بعدين انت من متى صرت بالفريق الإعلامي للموقع .. مع كل احترامي لك كعضو نشط .. ولكن هذي من اختصاصات الفريق الإعلامي يحددون الأسئلة اللي تنزل او لا .. شدعوة عاد انت حاط الأسئلة :) :) انت عطوك التسجيل وتوهقت بالتسجيل مو واضح

ومتى قلت انا من الفريق الاعلامي ؟ وانا وضحت ان في اسئله انسألت والتسجيل كان مسكر !

وفي اسأله ماكانت واضحه ! فقط لاغير

اما عن كم الاسئله فهذا رايي فقط لا غير .. :)

الحمادي
04-03-2007, 23:31
فعلا كانت مقابله حلوه واستمتعنا فيها وخاصه الموسوي كان بقمة الاخلاق والروح الحلوه ومرح :)
احلى شي انه تحدى احمد كورفيت قاله باجر بنفوز على القادسيه 3 تحت 19 وتراهنو وكسب الرهان الموسوي :)

السموحه للكل عن الخلل اللي صار غصبن علينا التسجيل كان مو واضح والكاميرا صوروا الشباب شكثر لكن ما ادري شنو كانت العله عموما نكرر اسفنا عن اللي صار واعذرونا ونحاول ان شالله بالمرات اليايه نتفادى هالاخطاء :)

قواك الله فهد وقواك الله عرباوي على تنزيل اللقاء والله يعطي العافيه كل الموجودين واللي ساهموا بانجاح المقابله :)

Corvette
04-03-2007, 23:33
الحمادي .. أوش ! :p
الموسوي يـا حظه ردي أو " قبس " التسجيل مو واضح والكاميره إختربت لما صورناه لوول :D

Fahad
04-03-2007, 23:44
شباب " بليز " خلكم بالموضوع :o

عبد العزيز الحمادي
05-03-2007, 00:25
20\ لاعب مظلوم اعلاميا على مستوى الكويت ؟




طلال نايف ومالك القلاف



مالك القلاف مظلوم اعلاميا؟؟ .. ملك التصاريح القلاف .. وعقب كل مباراة لازم تشوفه يصرح والاعلام يحب هالسوالف


العربي وافق على اعارتك الان وعندك فريقان اصفر وابيض اي نادي تروح ؟




نادي الكويت


اكيد راح تختار الكويت .. شتبي بالساحل :)




39 \ هل هناك مشاكل بين الاعبين والاداره ؟



لا ماكو شي الحمدالله



متأكد ؟؟

Barca4eveR
05-03-2007, 00:26
شكرا لحسين عالحضور ومبارك على اجراء المقابله وجهاز تسجيله الداج وشكرا فهد وعرباوي لصياغه موضوع
مقابله ممتعه وسهره حلوه مع بوعلي
وهاردلك فريق 19:(

Corvette
05-03-2007, 00:28
وينك يا بوصـالح الله يذكرك بالخير ..
الموسوي يقول مالك القلاف مظلوم إعلاميـا مايدري إن إسمه وصل العالميه :)

Q8i
05-03-2007, 00:53
يعطيكم العافية على المقابلة :) بالنسبة للصور موضوعهم عندي .. بعد المقابلة لعبنا طائرة مع الموسوي ودخل بالكامرة تراب واخربت انشالله بس اصلحها انزل الصور وابلغكم :)

ALkinG
05-03-2007, 11:37
قواكم الله .. وخوش لقاء .. :)

Firenze
05-03-2007, 11:48
فرسـت كلاس هاااا :p
ماشـي ياحسيـن ;)

موفق يابـوعلي .. وهالله هالله بالتـمرين :)

كويتاوي ما يغلبونه
05-03-2007, 13:01
يعطيكم العافيه على المقابله الحلوه هاذي

الموسوي كبير باللعب و الاخلاق و انشالله موفق مع ناديك :)

عربــاوي
05-03-2007, 13:45
ياجماعه جريب ونزل الصور ;)

makkay
05-03-2007, 13:49
ويت البكجرز

alkout
05-03-2007, 14:30
فان باستن اهم شي الســاحل الظاهر نسيت اصفر الكويت اصفرنا :p ولا كانت عالساحل لوول



وبالنسبه لكلامه عن مالك القلاف المقــصد مو اعلامــيا بالظــهور يقــصد مو معطينه حقــه ويمكن هالــشي صــح فأغلــب الاعبين اللي راحو المنتخب وبمركز القلاف مستواهم جدا عــادي بمستوى القلاف او انزل منه الا اهوا ماأخذ فرصــته

اما من ناحية المشاكل عندكم وعندنا خير :)

عبد العزيز الحمادي
05-03-2007, 14:45
اي خو في اصفرين بالكويت :) عاد انت تخيل الموسوي يلعب بالساحل .. اتوقع انك تبلعها يلعب بالقادسية اكثر :) لووووول

بالنسبة لمالك القلاف .. تقول اللاعبين اللي بمركزه مستواهم عادي .. ذكرني بس وين مركز القلاف .. لانه اشوف بسبع مراكز يلعب .. مرقلب دفاع مرة ارتكاز .. مرة هجوم ..

alkout
05-03-2007, 15:22
فان باستن يمكن صح مايلعب بالقــادسيه لأن القــادسيه مايعطي فرصه لناشئينه ومضيعهم فالساحل افضله حاله من حال المتروك :p


اما القلاف فالمركزين سواء نص متأخر او قلب دفاع ماشوف لاعبين بالكويت فارضين نفسهم بهالمركزين !!

يعقوب الطاهر بالفتره الاخيــره عادي وقبله خالد الشمري حده عادي ونهيــر مره فوق وعشره تحت اما حــاليا ممكن الوحيد اللي يقنع فايز بندر !!


اما الارتكــأز فمــاكو ولا واحد يقنع لا عتيجي ولا حسين حاكم ولا الموسى ولا شويع وانت رايح !!

Za3iM
05-03-2007, 16:30
يعطيك العافيه على المقابله الخفيفه

وكبير يا الموسوي

:):):)

ياكويت
05-03-2007, 17:03
رغم صغر سنه بس ردوده مو مندفعه وهاديه موفق يا بوعلي من شكلك هادي ومحترم وان شاء الله نشوفك من نجوم الكره مو الكويتيه بس الاسيويه بعد ........

Fahad
06-03-2007, 15:10
الله يعافيكم و " مكه " يوديكم

يستاهل لاعبنا بوعلي كل خير . . وترقبوا المذهل من المقابلات القادمه بإذن الله

David Villa
07-03-2007, 00:48
حـسين الـموسوي مع العرباويه :arabi:
http://www.image2host.com/uploads/7212e8314d.jpg

http://www.image2host.com/uploads/dce68917e3.jpg

http://www.image2host.com/uploads/6a4bbc257c.jpg

http://www.image2host.com/uploads/46e939ecd5.jpg

http://www.image2host.com/uploads/b3f3fcd3ac.jpg

قـدساوي - كـويتاوي - عـرباوي
http://www.image2host.com/uploads/eada433c4f.jpg

الـموسوي بلعب الطـائرة..اللي انتهت بفوز العرباويه
http://www.image2host.com/uploads/543e4fb120.jpg

http://www.image2host.com/uploads/35cd36cf0c.jpg

Q8italy
07-03-2007, 02:13
تسلمووووون على إضافة هالصور الحلوة :)

L. FiGo
07-03-2007, 13:17
الصور حلوه مشكورين

Claudio Mendez
07-03-2007, 14:21
اشوا .. عبيد تركي مو معاكم !

Fahad
09-03-2007, 12:15
حياكم الله والقادم مذهل إن شاءالله

:)

Firenze
09-03-2007, 12:25
http://www.image2host.com/uploads/b3f3fcd3ac.jpg

شـ هالنظره يابو علـي :cool:

Shag7a
09-03-2007, 13:05
توني أنتبه حق المقابله .. تصدقون أنا عندي لو ما يتثبت الموضوع أحسن :o دايما أنسى ما أشوف المواضيع المثبتين أنتبه حق العاديين إلي تحت أكثر ما أدري ليش !


مقابله حلوه و خفيفه مشكورين و الله يعطيكم العافيه .. و شكرا على الصور ماا قصرتاو والله :)

Fahad
09-03-2007, 13:08
الكبر شين وأنا أخوج . . النظر عندج ضعيف :p

::

حياكم الله والسموحه على القصور إخواني وخواتي :)

Shag7a
09-03-2007, 13:52
صااج يا خوي الكبر شييين :o :D
لا بس صج ساو إستفتاء شوف الأعضاء حق أي موضوع ينتبهون أكثر .. العاديين ولا المثبتين .. راح تشوف إن العاديين و مومثبتين أكثر .. بس يبيله واحد يتابع الموضوع و كل شوي يرفعه إذا نزل وايد , بس بدون تثبيت :o



شكرا ومره ثانيه بانتظار جديدك يا فهد :)

KUWAIT_VOICE
21-04-2007, 08:16
تسلم أيديك أخوي على هالموضوع ;)