المساعد الشخصي الرقمي

مشاهدة النسخة كاملة : فـضـفـضـة آسـيـويـه بـعـيـن خـلـيـجـية



MAS1900
27-01-2011, 11:36
اعجبني الموضوع و ارت اشاركم.................

السلام عليكم ورحمة الله وبركاته

بسم الله الرحمن الرحيم



بما ان الي يميز دول الخليج بشكل عام المجالس والدواويين .. حبيت انقلكم اجواء الدواويين او جزء من اجواءها والحوارات الي تتم عن كاس آسيا .. في مجلس الاهل كان يتواجد رجال كبير بالعمر [ شايبنا ] ويتابع مباريات كاس اسيا بشكل عام ومباريات الخليج بشكل خاص .. فحبيت اخذ منه اراءه عن المنتخبات والبطوله واستضافة قطر لها بشكل عام .. وطلعت منه بهالحوار ونقلته تقريبا حرفيا مع تبسيط اللهجه " القح " حتى تكون مفهومه للجميع !



[ بعد السوالف العاديه مثل اخبارك و كيف الدنيا بك .. ابتدينا ]


كويتي : تخبر يوم اعلنو ان قطر بتستضيف الكاس يومها قلت ابشر بافتتاح يبهرك ؟ هو معاك حق بس ليه قلت هالجمله يعني

ابو عبدالله : هو في شي بديهي بالمنطق تعرفه وفي حاجات بعد تفكير تستنتجها ومسالة ابداع قطر في التنظيم اصبح شي بديهي .. الناس في قطر تعرف كيف تؤكل الكتف على مايقولون ولكل مجتهد نصيب , والرجال الي طلع وكلم الشيخ هذي بروحها اي عاقل يفكر فيها يحس ان الشعب والامير واحد ومابينهم اي حواجز ولا به رفعة وتكبر الله يديمه لهم ويخليه

كويتي : بس صراحه خربوها وحبطو الاميير يومها العنابي

ابو عبدالله : المشكله ان الفريق ماحس بالمسؤولية وحس انه لو خسر فيه من يرقع له ويطبطب عليه ويقوله لاباس عليك تعوضها بغيرها وهالشكل المشكله تتضخم ويصير اللاعب ماهو بمسؤول يعني خذ مثال لعيبة اليابان مثل ماتجيهم المكافئات يجيهم الخصم لكن شف عندنا بالخليج مانحس بخصومات مغير يعطون ولهالسبب الاحساس بالمسؤوليه مات !

كويتي : هو معاك حق بهالنقطه بس هم صلحو الوضع يوم شافو الجمهور قام عليهم

ابو عبدالله : غلطان ماحسو لان الجمهور قام عليهم حسو لأن شف الاعلام كيف فصل كل لااعب وذكرو بالاسم فلان تنقطع منه الكوره ويتم في مكانه وفلان مايركض عدل وفلان ماهو بمغطي زين وهالشي خلاهم يعرفون ان لو الي فوقهم ماحاسبوهم في اعلام مستعد يوصلهم للارض مثل مارفعهم .. وبعدها شفنا الروح ردت والحماس ضد الصين وضد الكويت

كويتي : ههههه عااد مباراتنا مع قطر الوحيده الي مالعبناها عدل .. وبما اننا جبنا طاري الكويت قولي شلون كان مستواها في البطوله ؟

ابو عبدالله : ههههه والله اني كنت اتمنى قطر تفوز يومها لأن فرصتها في التأهل اكبر ومو بس هالشكل ماهيب حلوه البطوله لو البلد المستضيف يطلع وحلاتها تكتمل بوجود الجمهور وغير هالشي تمنيت انهم يراضون شيخهم بعد مازعلوه اول يوم , وحنا لاعبينا فرحوونا في بطولتين والطريق قدامهم ومع ان الكل مقتنع في غوران بس انا ماهو بعاجبني ابد يمكن يحتاج خبره زياده ويمكن مخه هذا حده !

كويتي : تشجع قطر على حساب الكويت هههههه وين الوطنيه بسس صدمتني

ابو عبدالله : انت تتغشمر ولا من صجك ؟ الوطنيه ماهيب على كوره ! .. انت تتمنى الافضل لبلدك والافضل للكويت ماهو بكاس اسيا حتى نقيس وطنية رجال البلد على 11 لاعب يطقون كوره ويلحقونها .. مع ان فكرة ربط الوطنيه بالكوره منتشره كثير لكن الخطا خطا ولو سووه مليون !

كويتي : فهمت عليك .. بس تبي الصج صدمووني محد تأهل لدور الـ 8 من الخليج الا قطر !!

ابو عبدالله : الي متابع الكوره الخليجيه عدل بيعرف وبيتوقع ان ولا واحد بيتأهل لدور ال8 و قطر تاهلت بفضل عامل الجمهور والحماس ولا لو بغير قطر ماظنهم بيتأهلون وبيصفون جنب ربيعهم .. يعني شف على سبيل المثال السعودي بطل 3 مرات لكن من سنين والسعودي ماهوب بالسعودي الي نعرفه على لعيبته الي يحرثون الارض كنا نسمي الاخضر فريق المتعه من كثر ماهو يبدع ويمتعنا .. لكن شف الآن مافيه تجديد للدماء يلعبون على الاسماء وغير هالشكل تخطيط سليم مابه والنتايج متنازله .. ولو شفت عندنا في الكويت فالامور متشابهه لحد كبير لكن في الفتره الاخيره بدت الاوراق تتضبط وان شالله تستمر .. بس بعد ماياهلنا للدور الي بعده و الامارات لو داش بالاولمبي كامل مع مدربه وجهازه الاداري شفته فالادوار المتقدمه بس لأنه مع هالمدرب والتشكيله الي فيهم ناس مستوياتهم نازله ماتأملت فيهم خير وكذلك الامور ماشيه على البحرين الي ابدا ماكانت لها فرصه في ظل الغياب والفرصه اقصد في الترشيح للدور الـ 8 .. كل الفرق الخليجيه قدمت مستويات جيده وحتى السعودي الكل يشوفه بهالسوء لأنه البطل ولو انه فريق عادي مثل ربعه ماكانت هالبلبله صارت كلها .

كويتي : طيب ليش هذا وضعنا ؟ ليش الناس تتطور وحنا محلك سر ! مع ان اكثر ناس يدفعون فلوس ع الكوره الخليجيين !

ابو عبدالله : هذا التفكير الي مرجعنا ورى والناس تتقدم نفتكر ان كل شي يجي بسرعه بدوانا وحضرانا الي بنو هالبلدان مابنوها بيوم وليله .. البدو رحال شهور وايام لجل يرجع برزقه ويعمر ويسكن والحضر يغيب شهوور ويشوف الموت بعينه ويرجع لبلاده .. ويد على يد على مر السنين شفت هالبلدان قامت ومن يصدق انها كانت طين .. هالحين الكل يبي يسوي انجاز يتسجل باسمه يبي الانجاز يستوي في عهده لجل يقولون المنتخب الفلاني اخذ كاس اسيا او تاهل لكاس العالم في عهد رئيس الاتحاد فلان الفلاني !! والمصيبه ليته يسعى بالطريقه الصحيحه يستعجل في تعيين مدرب يكون اقل او اعلى من امكانيات اللعيبه !! ولذلك نشوف لغة التفاهم بينه وبين اللاعبين معدومه وبالاخير يفشل ! ولا يعتمدون لك على النجوم والله عندنا في القائمه 5 او 6 اسماء معروفه نجوم في الدوله تلعبهم يعني تلعبهم حتى ولو مستواهم اصبح اسوا مايكون !!

كويتي : والله هالمشكله منتشره عند الكل تقريبا واقصد خليجيا .. بس بعد احيانا ماعندك الا هالناس ومافي افضل منهم شتسوي ؟!

ابو عبدالله : هني يجي دور الدوري .. انت عندك دوري والمفروض ينتج لك اللعيبه الي تحتاجهم لما يكون الدوري كله محترفين ويكون الدوري كله معتمد على اللاعبين الاجانب فانت بين اختياريين ياانك تقللهم او انك تجنس هالمحترفين ويمثلون بلادك وحنا كخليجيين ولو التجنيس شي طبيعي وعادي نرفضه لأن ودك بواحد من ثوبك لجل يوم تفوز مايقولون لك ماهيب باقدام رجالكم والخليجيين معروفين - حق الشماته ياسعد ! - وحيلهم دايم في الطنازه يطلعونه في بعض , فالحل الامثل بوجهة نظري انهم يدفعون لهالمحترفين فلوس لحصص تدريبيه وكل واحد يدرب له ثنين ولا ثلاثه يكونون وياه بالنادي ويعلمهم اسلوبه في اللعب وياخذ فلوسه وحقه وبالتالي كانك استنسخت اللاعب بس على لاعب محلي مع الايام بتلاحظ ان امكانيات هاللاعب بتزيد ولو انت مهتم به عدل راح يزيد امور وفنيات من عنده حتى يبهرك ويجبرك تهتم اكثر !

كويتي : والله الحين الكوره اسوأ دوله خليجيه مهتمه في الرياضه .. يعتبر اهتمامها افضل من الاهتمام ايام امجاد الخليج .. ومع هذا نتايجنا حاليا ولا توصل نص ابداعاتهم في ذيك الفتره !

ابو عبدالله : ايييه لو بترجع لايامهم فيصل الدخيل وجاسم يعقوب وماجد عبدالله ومنصور مفتاح وصوفي وعادل خميس والنجوم الكبار والجيل الي صنع التاريخ .. الحين لو يقولون لك فرنسا بتباري قطر الكل يقول 6 - 0 لفرنسا .. بس في ذاك الوقت قطر احرجت فرنسا وان ماخانتني الذاكره كانت 1 - 0 لقطر .. و شوف السعودية والكويت ونتايجهم عاد الي تبرد القلب كاس اسيا بالجيب ويتأهلون للعالم .. والحين ترجي ودعوات و لا بعد مايوصل الا الاخضر واخر مره شكله قال ماني مخوّن بربعي بقعد معاهم !

كويتي : طيب شسبب اختلاف النتايج هذي ؟!المفرووض يعني المنطق يقول ان لازم الامور تتعدل وتصير افضل !

ابو عبدالله : كلامي احتمال مايعجب ناس لكن انا بقولك شغله للاسف حنا طبقنا الجزء الي ماهوب حلو فالاحتراف .. ونسينا الجزء المهم .. ابسالك لو انت عندك شخص متطوع يجيك كل يوم يشتغل عندك وبعدها يمشي وماياخذ ولا فلس .. وبعد فتره قررت تمشي له معاش .. لكن بنفس الوقت انت تعطيه معاش وانت ماتجبره بوقت معين او بعقوبات او باي شي من هالكلام .. وش بيصير ؟ الموظف بيصير اكسل منه مابه ! .. هالي صاير في اللعيبه بعد ماكانو هواة صارو ياخذون رواتب لكن لو تأخر خمس دقايق معليه لو تأخر عشر دقايق معليه .. لو هم في معسكر وواحد يتأخر على وجبة الغدا شوي معليه محد يحاسبه .. ليه ؟ .. تدري ان الانضباط في هالامور راح يأدي لانضباط في كل الامور الاخرى !! .. يعني لو اللعيبه ينضبطون بهالامور كان شفنا انضباطهم الي - اي كلام - في الملعب !! من امن العقوبه اساء الادب !!

كويتي : هل تتوقع بيوم نشوف لاعب خليجي في الدوري الاوربي ؟

ابو عبدالله : كل شي جايز بس لو تمو على حالتهم نفسها ونظامهم الي فالخليج صدقني اسبوع وبيعوّد لبلاده لأن هناك ماعندهم انتظرني انت تنتظره وتعيش كأنك ساعه بتنظيم ولو جبت العيد ابشر بالعقوبات الي تخليك ماعاد تفكر تعوودها ابد !

كويتي : طيب ليش مانشوف هالعقوبات عندنا دام لها هالتأثير ؟ يعني العقوبه سهله رئيس الاتحاد يتخذها وخلصنا .. دامهم يقدرون يوفرون المكافئات لازم يقدرون يحطون هالعقوبات !

ابو عبدالله : لأن بعض الاتحادات شكليه في الخليج يعني كل اتحاد فوقه شخص يحركه وهالشخص يتبع ان حبتك عيني .. لو شفته يحب فلان وفلان تلقاهم دايم يلعبون اساسي والي فيه خير يطلعهم والعكس طبعا لو بينه وبين اشخاص مشاكل ولا عمرك بتشوفهم يمثلون المنتخب ابد لو هم افضل الموجودين !

كويتي : اييه فهمت عليك .. بس والله بردو قلبي كوريــآ عليهم لعب عليهم سسرعه

ابو عبدالله : والله ايران قدمت مستويات كبيره لكن الحظ ماساعدها في هالمباراه وخسرت نفس قطر قدمت مستوى جيد وكان الفوز فاليد لكن المدرب ضيعها والله لو ان امر ميتسو في يدي جان مهف مقيط الي راح ولا عاد عوّد .. لكن شنقول قدر الله وماشاء فعل .. كوريا واليابان واستراليا واوزبكستان .. هم نخبة اسيا حاليا 3 منهم تأهلو لكاس العالم من قريب واليابان فازت ع الارجنتين وكوريا احرج البرازيل وفايز على ايطاليا في 2002 وطبعا المنتخب الاوزبكستاني شفنا ابداعه مايحتاج اقولك مباريات معينه .. يعني فريق مبدع ! وماشفته بولا مباراه محرج .. يعني كوريا احرجوهم استراليا .. والبحرين احرج استراليا .. واليابان كانت محرجه من ثلاث منتخبات الاردن وسوريا وقطر !! .. فالاوزبكي ممكن نقول ماحصل صعوبات كبيره وكان يمشي مبارياته على مزاجه ومشتهاه .. لكن بعد الدول هذي مع كل مباراه يزيد معدل نشاطهم وقوتهم !

كويتي : المباريات بتكون قوية صراحه بس على الله مايخربونها الحكام .. مادري ليش ماتم الاستعانه في حكام من اوروبا .. يعني اوكي استعين باسيويين لكن اختار الافضل وكملهم من اوروبا افضل بدال لاتتوهق !

ابو عبدالله : ثلاث حكام اتمنى استبعادهم عن النهائي لاخطائهم ومانقول متعمدينها لكن نقول انهم كانو منشدين .. عندك بنجامين الاسترالي و عبدالرحمن القطري و صبحي الدين .. اخطائهم كانت نوعا ما مخربه يعني .. بنجامين طرد وبلنتي وقول .. عبدالرحمن ضربة جزاء وكرت احمر للاسترالي او اصفر ع اقل تقدير غير الشد العصبي الي خلاه يصير فالمباراه .. ونختمها بصبحي الي كمل الصفه قول جا من فاول اصلا ماهوب فاول وكرت احمر على نفس اللعبه غير لمسات اليد على الفريقين والخطأ الاكبر عندك لاعب ينزف واللعب مستمر 5 او 6 دقايق ليه ماهوب ببشر ؟ ولا مفتكر دمه شلال ! .. والله فكرتك ماهي بشينه بس صعبه التطبيق لأن بيقولون لك نبي نطور حكامنا مهب بس اللعيبه الي يبيلها تطور .. فانت خذ وخل من هالكلام لين تشبع لأن لهم سنين يقولونه ومازالت اخطاء الحكام على ماهي عليه

كويتي : بخصوص صبحي الدين .. يمكن ماشافه لأنه لو شافه اكيد بيوقف اللعب هالشغله من مسلمات التحكيم عندك لاعب مصاب لازم توقف اللعب

ابو عبدالله : لو هالعذر على ايام جاسم يعقوب بقولك معاك حق والله مافيه تطور ومافيه يصارخ الرجال على مساعدينه .. لكن الآن حطو لهم المايكات والسماعات وهات هرج على سنع وغير سنع .. ليه مافي حد نبهه ؟ وحده من الثنتين ياانهم عارفين انه ماهوب راد عليهم او انهم مثله معطين اللاعب اكبر طاف .. يعني فنيلة اللاعب بيضا ودمه تحت الشعار بالضببط شلون ماتوضح الله العالم والمشكله اللاعب في آخر الدقايق يحصله فاول ولا يحتسب له هههه شر البليه مايضحك ياشيخ خلها على ربك حكام آسيا من اسوء لاسوء مابهم حكم تقدر تقول انه ينافس حكام اوروبا الا ماندر .. لكن نقول هم بشر والله يكون فعونهم !

كويتي : شكلك صدعت وتعبت بس سسؤال .. من بياخذ الكاس ؟ وشرايك بشكل عام فالبطوله ؟ من وجهة نظري كانت حلوه ومستوياتهم جميله الاغلب طبعا

ابو عبدالله : قوم العيون المشخطه ياكوريا يا اليابان باذن الله يخطفونها لأنهم لعيبه يعرفون ان الكوره اخلاق قبل لاتكون منافسه شفهم وشف تصرفاتهم وحركاتهم وانضباطهم فالملعب وانت تفهم قصدي .. البطوله هالسنه كانت غير ياخي كنها كاس الخليج بس مسوي دعوه لفرق اسيا يعني تحس فيها جو خليجي بحت تشوف الجمهور بدشاديش وغتر وتشوف المذيعين وتسمع صراخهم وتشجيعهم او انك تشوف مقاطع من البطوله والتنظيم وتلقاها في شوارع خليجيه هالشي بروحه يحسسك باحساس غير ومن فتره طويله ماشقيت في بطوله كثر ماشقيت بـ اسيا الدوحه بس لجل عيون انها في دوله خليجيه

كويتي : والله السووالف ووياك تحلى بس قبل نقفل الموضوع .. لو بيدك تجمع جماهير الخليج كلهم وش بتقول ؟

ابو عبدالله : اكبرو ثم اكبرو ثم اكبرو .. منتم ببزارين على كوره تنشات تتهاوشون وتوصل الدم للركب وتدخلون رموز دول وتخربون علاقات شيبانكم تعبو عليها وشيوخ بعقول صانووها وانتو تخربونها اعقلو وخلو الكوره بعد ال 90 دقيقه تنتهي وترجعون مثل ماكنتم اخوان وحبايب وبني عم .. ووخفو على اللعيبه بالنقد والنقد الي بسب وتهجم وتخسيس وتنزيل في اللاعب وتهين كرامته منت بحاجته ولا اللاعب بحاجته .. اما انك تنتقد صح ولا لاتنتقد ابد افضل .. ياانك تبني اللاعب ولا خله لاتهدمه يمكن غيرك يبنيه لكن تبني شخص من مستوى معين اسهل واسرع من انك تبنيه من الصفر .. وانتم لو غلط اللاعب استلمتوه وماخليتوه في حاله وكأنه اول لاعب كوره يخطي .. والاهم من هذا وذاك لاتاخذكم المباريات والرياضه عن الاهم الصلاه والدراسه هذي آخرتك وذاك مستقبلك والله يوفق الجميع