السلام عليكم ..

طبعا ادري ان المنتدى و ميت بس ذكرياته صج حلوه ..

...

بالنسبه لي احب اقرا و اكتب .. و احب الرياضه و احب الكويت .. زادت مشاركاتي ايام الغربه و الدراسه لان الديوانيه كانت تقربني من الكويت..

الي لي الحين اذكره مواضيع العضو " راعيها " كان صج يعرف يكتب .. حاولت اكتب مواضيع .. و لي الحين اذكر احلى الشغلات لمن حصلت جائزه افضل عضو .. و افضل موضوع .. كانت سعاده ما بعدها سعاده .. اذكر بومشيل دزلي الخبر .. عقبها ترشحت مراقب و و اذكر عقبها جابلت الديوانيه من قلب و تأثرت دراستي و لي الحين اذكر بعدها مبارك الدوسري يتصل علي و انا بإيرلندا و يقولي رشحناك اداري اذا تحب ..

لي الحين اذكر نقاشاتنا برابطه العربي " الحمادي الله يرحمه .. كلاوديو مندز .. فيصل العرباوي .. عرب .. قحطه .. مانيو .. دايفد فيا و بنت الديره" و رابطه اليوفي ..

قسم الافلام و المسلسلات .. لي الحين اذكر عضو رشحلي اشوف مسلسل breaking bad و كان توه مبلش ثاني حلقه و الحين صار من احسن المسلسلات الخالده .. بصراحه نظرته صج قويه الله يذكره بالخير .. و اذكر عزيز الحمادي بو بدر الله يذكره بالخير " لي الحين اشوفه بشامبينز الجابريه بس ما يعرفني "

ايام كاس الخليج يصير اوفرلود على الموقع ،، الخليج كله يدش طبعا ..

مباريات العربي و القادسيه نفس الشي .. لمن العربي يفوز يغيبون القدساويه يومين و العكس صحيح

اذكر كان في اعضاء مشاغبين حيييل ! تعبونا ايام ما كنا مراقبين .. و اذكر اخواني السحابه و سمارت بوي من السعوديه ..

من الاشياء الي تحسفت عليها اني ما تعرفت على اصدقاء خارج المنتدى ... كانو يعزموني و كنت اعتذر للاسف .. بس الي اعرفه الكثير كون صداقات مستمره لي الحين ..


الغرض من الموضوع سرد بسيط حق ذكرياتكم الحلوه .. و شكرا

نسينا شلون نكتب سامحونا